【記住1834633】全家還債 苦媽媽:賭波害死我個仔
大耳窿外圍負債追數賭波賭債世界盃
世界盃全城狂熱,但72歲的林婆婆最討厭就是這項盛事,全因4年前的巴西世界盃來臨前,她最痛錫的兒子就因為賭波負債纍纍,走投無路下燒炭了結生命,兒子離世翌日更有收數佬踩上門追數,《蘋果》當日直擊白頭人送黑頭人的林婆婆飽受驚嚇哭得死去活來,肝腸寸斷。4年過去,這位花盡90萬元棺材本代子還債的苦媽媽,未有一天睡得好,還擔心大女按樓借出逾百萬元為亡弟還債承受不起巨大壓力,「我都驚佢頂唔順去自殺!賭真係害死人,最好政府全面禁賭!」
「本人梁偉興是給外圍德明、大耳窿老朱、梁收、放數呀嫂mei等人迫死,本金已還足,仍然要威嚇,每天未能工作,太辛苦,希望警方在本人死後能跟進及保護我的家人。(在我電話內全是恐嚇信息)」2014年4月24日梁偉興絕筆。」
當日,38歲裝修公司老闆梁偉興在土瓜灣的裝修公司燒炭身亡,遺下的就只有這封遺書、大量財務公司的卡片,以及大疊借據。事隔4年,滿頭白髮的林婆婆仍保留着兒子阿興留下的親筆遺書,但甫拿起遺書,淚水和怒火一湧而至:「冇咗個仔,係人都傷心啦,老公叫我唔好諗咁多,我晚晚都瞓唔到覺,我而家都瞓唔到㗎!」
阿興經營裝修公司多年,未婚的他與媽媽及繼父同住公屋單位,在媽媽眼中是乖仔一名,「佢好孝順、好錫我,有錢就畀我,屋企每月屋租、水電煤逾萬元,都係佢畀錢,平時見佢賭吓馬仔、六合彩就有,根本唔知咁大鑊!」直至2013年突然有大耳窿上門追數,才驚覺阿興欠下巨債,更透露有尋死念頭。
林婆婆育有6名子女,阿興排行第5,為幫阿興還債,全家出錢相助,「我同老公將90多萬棺材本攞出嚟、大仔向財務公司借貸10萬、大女辭工攞40萬元強積金,又將剛供完的天水圍居屋按樓套現約100萬元!」但阿興賭性不改,2014年農曆新年,阿興不停接到追數電話,「佢喺廳騰來騰去,我真係驚佢由窗跳落去,我要睇實佢,我哋嗰時先知佢欠嘅債,還極都唔完!」最終阿興在4月燒炭自殺,林婆婆傷心欲絕,但追數公司仍上門追數,直至出示阿興死亡證才收手。
雖然至今再無人來追數,但林婆婆一家生活足襟見肘,大女按樓的借貸就靠其丈夫在每月薪金扣除,「每個月還樓按加其他債項一共要還1.5萬,佢老公幾乎冇錢用,仲還20多年,我都驚大女頂唔順去自殺!」不過林婆婆仍拒絕領綜援,每月逾萬元開支,就靠子女給予數千元生活費、阿興女友代交3,000多元租金,以及丈夫到燒臘店做兼職,「我老公已經66歲,心臟有事都要開工,一周開2、3日工,朝8晚8,見到都好辛苦,我哋依家冇晒積蓄,惟有死慳死抵,將來都唔知點算!」
全家被阿興的賭債拖累,不過他在林婆婆心目中仍是最疼錫的兒子,一提到阿興親手下廚,一直愁眉不展的林婆婆終露出笑容:「生佢嗰時,佢屁股出世,好危險㗎!但佢由細到大都好聽話,以前佢早收工,會買餸返嚟煮畀我食,佢煮嘅蒜蓉蒸蝦最拿手;我生日,佢會請晒全家出街食飯,休息會陪我飲茶!」令媽媽最深刻的是2013年初,她輕微中風,阿興雖然欠下巨債,但仍聘請工人照顧媽媽,「工人嚟到見無獨立房,就話唔做,阿興為咗留住工人,花咗3日時間一手一腳砌好一間房,我一諗佢咁樣(自殺),個心真係好痛!」
現時工人已走,房間留給每日來探望她的大女休息,女兒深怕媽媽一個人在家會胡思亂想,「好寂寞,成日聽見門聲,以為佢返來,我白白冇咗個仔,真係好傷心!」她直言賭波害人害物,「唔賭咪無事囉!我日日打開報紙都有類似新聞,賭真係害死人,希望政府全面禁止賭波!」
戒賭熱線:1834633
東華三院平和坊:(熱線) 2827 4321 / WhatsApp:6770 5599
香港戒賭中心:(熱線) 2426 6262
明愛展晴中心:(如有緊急情況,請電) 18288 / WhatsApp:6829 8764
路德會青亮中心:8108 3933 / WhatsApp:6606 3933
錫安社會服務處勗勵軒輔導中心:2703 9811 / WhatsApp:5313 3011
基督教新希望團契:8116 0083
工業福音團契:2748 7207
阿興爛賭欠下巨債,林婆婆夫婦和五子女均傾盡家財幫忙還債,但兒子仍走上不歸路。(周子惇攝)
林婆婆稱兒子阿興十分孝順,當年她患病,兒子為留住照顧母親的工人,不惜花3日時間就建好一間房。(周子惇攝)
4年前阿興(小圖)燒炭自殺,林婆婆一家都傷心不已,惟翌日有收數佬(左圖)上門追數,把她嚇個半死。