京奧過後，一度掀起熱潮嘅數碼廣播都沉寂咗一輪，近日土炮機頂盒製造商PixelMagic出咗幾款新機頂盒，大玩互動gimmick。老細Nelson話，收睇緊電視節目嘅用家遇到廣告時間，只要㩒一下機頂盒遙控器，就可以經機頂盒上網睇即時《蘋果日報》，唔使嘥時間睇廣告。
早幾日撞到TVB嘅總經理鄭善強，小藍同佢傾開𠵱家機頂盒嘅新增互動功能後，佢話TVB短期內進一步發展數碼廣播互動電視，就係直接簡單，方便易用。𠵱家蘇施黃主持嘅飲食節目《蘇GOOD》好受歡迎，觀眾一邊睇一邊好想即時知道間食肆喺邊，TVB打算係呢個節目加入互動功能，「只要喺遙控器㩒一個掣，畫面角落即刻彈出有關食肆嘅名、查詢電話等基本資料，易睇易用。」