【娥特1年】35%受訪市民畀嬲 斥「沒有一樣做得好」

蘋果日報 2018/03/25 00:30

林鄭月娥娥特1年
    特首林鄭月娥當選一年，作為「老闆」的市民，對其工作表現又是否滿意？《蘋果》以問卷訪問100名市民，發現僅3成受訪者對林鄭的整體工作表現感滿意，有3成半受訪者指林鄭「沒有一樣做得好」，最多受訪者認為林鄭解決房屋問題表現最差。特首辦稱，特首會繼續努力服務市民。有學者指，林鄭如想提升成績，民生政策要夠突破。
    記者 李詠希 梁銘恩
    《蘋果》本月在銅鑼灣、炮台山及旺角，以問卷訪問100名成年香港居民。有26%受訪市民對林鄭整體工作表現感不滿及非常不滿、44%認為「一半半」，僅30%感滿意及非常滿意。35%受訪者直指林鄭「沒有一樣做得好」。最多受訪者指林鄭解決房屋問題上表現最差，佔44%。其次為捍衛本港法治及民主自由，和紓緩中港矛盾，分別有40%及30%。
    林鄭表現最好的範疇，分別有29%及20%受訪者認為是扶貧安老及改善公共醫療。多達64%受訪者最期望林鄭增建資助房屋，壓抑樓價，其次有31%希望全民派錢，亦有29%及27%受訪者希望林鄭落實全民退保和收回單程證審批權。受訪者近7成自稱中立或無政治傾向，約2成稱支持民主派，其餘為支持建制派、港獨或本土派等。
    特首辦回覆《蘋果》說，特首會按她在施政報告中勾畫的願景，繼續努力服務市民。不過參與問卷的大專生曾小姐說，林鄭任政務司司長時發生人大釋法及DQ議員風波，當選特首後又顯得「事不關己」，無捍衛本港法治。從事服務業的曾先生稱，林鄭上任後激發不少社會矛盾，如DQ立會補選參選人等，令政績分數大減，「我唔信林鄭冇責任」。
    原對林鄭充滿期望的退休人士區先生指，律政司司長鄭若驊甫上任便爆出僭建醜聞，反映林鄭用人不當之餘，「仲要包庇，神仙難救」，對林鄭感失望，但認為林鄭「聽阿爺話」，故「阿爺」無挑剔她，「都算紓緩中港矛盾」。大專生梁小姐說，林鄭政策較親中央，「似延續梁振英，成日講一帶一路」，促林鄭先顧好港人福祉。
    理大社會政策研究中心主任鍾劍華表示，林鄭自競選特首至今，給人依仗中央支持的感覺，「佢亦冇特登去洗底」，相信外界對林鄭的政治評分不高，故即使林鄭向國家主席習近平「擦鞋」、發生DQ補選參選人等事件，市民也不會覺得意外，「雖然反對林鄭嘅人冇增加，但支持佢嘅人都冇多到」，預計林鄭的民望短期內不會有大變動。他指政府新班子蜜月期早已過去，林鄭若想提升「成績」，就要在民生政策有突破性進展，並得到民主派配合。
    《蘋果》問卷調查市民對娥特評價
    ●整體工作表現
    不滿及非常不滿／26%
    一半半／44%
    滿意及非常滿意／30%
    ●表現最差的首三範疇（可選多於一項）
    解決房屋問題／44%
    捍衛本港法治及民主自由／40%
    紓緩中港矛盾／30%

    《蘋果》沙士15周年系列網站，正式登場：
    https://hk.feature.appledaily.com/sars15
    empty
    曾被諷刺「嬲嬲多到上鼻」的林鄭月娥，《蘋果》邀請市民貼貼紙，當中仍然以「嬲嬲」佔最多。（何柏佳攝）
    empty
    大專生梁小姐（左）（50分／政策要顧港人福利，搞好香港先再推進去內地）「林鄭份人比較離地，政策亦較親中央，似延續梁振英，成日講一帶一路。最想佢支援多啲支援學生升大學同情緒問題，學童自殺太嚴重，讀書太大壓力」。
    empty
    商界鍾先生（70分／俾更多言論同生存空間年輕人，而家佢哋連最基本生存空間都無）：「香港要推經濟同大灣區融合，呢啲因要國家大政策配合，所以林鄭較易呢方面攞到政績。但民生就唔夠，首置盤講咗成年都未有詳情，數量又少。同埋希望居屋可以同私人市場樓價脫勾，唔好俾市場牽住走」。
    empty
    技工刁先生（30分／無嘢好講，好失望）：「林鄭無主見，無樣嘢做得好。初頭對佢有期望，而家好失望，愈做愈差。最差係捍衛本地法治，要告嘅唔告，尤其佔中咁多證據都唔告。梁振英夠強硬，做得好過林鄭。同埋佢淨係幫中產，應該幫下基層，全民派錢」。
    empty
    大專生黃小姐（50分／幫多啲小朋友）：「林鄭做得還可以，上任之後有落區，感覺親民。但教育方面無政績，小學TSA/BCA搞咁耐都未擱置，而家啲小朋友讀書好辛苦，佢要多啲為下一代著想，佢似幫中產商界」。
    empty
    服務業曾先生（60分／加油，盡量平衡中港、建制民主派兩面，做事唔好做得太過份）：「林鄭唔識令中國人同香港人融和啲。我住上水，拖住小朋友行唔到行人路要行馬路，仲要被喼拖過隻腳。有時唔係唔肯包容，但林鄭到而家都無處理過。另外，DQ補選參選人太過分，佢話係律政司做，我唔信係佢無份囉」。
    empty
    運輸業李先生（60分／唔派錢唔緊要，但要多做實事）：「全世界都推標準工時，香港工時太長，想做運動都無時間。林鄭應快啲推標時，至少俾打工仔有個選擇。其實搞好標時，啲人健康啲，對醫療嘅負擔都會輕啲。但林鄭長遠亦要搞好醫療同安老，全民退保佢一定走唔甩」。
    empty
    市民謝先生（60分／房屋問題仲未解決到，希望政策做好啲 ）：「林鄭放好多錢去推動創科，但中小企對香港經濟都好重要，希望佢都可增加對中小企嘅支援。同埋大灣區都係趨勢，唔想香港被邊緣化，搞好對香港有好處」。
    empty
    市民鄭先生（50分／難得有女士做特首，希望你大膽啲落實政策，唔好墨守成規）：「房屋同安老問題過去嘅政府一直拖，無特首有大膽政策去處理，而家咁多深層次矛盾都係源於咁。與其撥幾百億搞創科，點解唔俾幾百億去做民生？受惠人數又多啲，社會矛盾都少啲」。
    empty
    保險業洪小姐（70分／希望你幫香港人爭取多啲福利，改善貧富懸殊）：「而家樓價太貴，辣招都抑壓唔到，太多人上唔到車，林鄭房屋方面要再做多啲，幫中產上樓。另外醫療同全民退保要盡快做好，香港已經落後其他地方好多」。
    empty
    會計業鄭先生（50分／加油，都係當選一年啫。唔好被「阿爺」食住）：「中港矛盾越來越嚴重，港府要拎返單程證審批權，咁多內地人落嚟，香港已負荷唔到，起碼審批應該改嚴格啲，減少人數」。
    empty
    大專生曾小姐（60分／唔好只做你認為合理嘅事，要深入地了解市民真正需要）：「上任以來多咗人反林鄭，因為佢無捍衛到法治。上屆梁振英聽晒阿爺話，希望林鄭會聽多啲港人聲音，但暫未見佢有亮眼政績，會放長雙眼觀察」。
    empty
    退休人士區先生（65分／俾啲勇氣，你係特首，一定有方法解決問題）：「當初對林鄭期望幾大，但發生咗鄭若驊件事，就知林鄭不外如是、用人不當。阿爺用鄭若驊係聽你意思，但你又唔去查清楚人哋個底就介紹俾阿爺，佢難辭其咎。不過林鄭幾聽阿爺話，阿爺就對佢無乜挑剔，咁都算紓緩中港矛盾」。