花旗股市前晚炒高，話就話炒減息，實情就係喺季結前造靚盤數，唔係出report都唔知點同啲投資者交代，睇個勢，花旗股市昨晚會繼續砌上去，話唔定今晚季結，道指會出現新高指數。
信貸危機未搞掂，經濟前景麻麻，咁都新高？如果咁諗就錯嘞，短線嘅市況唔係大家諗得咁正路嘅，有好多因素可以影響個市，但多數都只係短線嘅因素，諗得咁遠，仲有邊個炒股票？
好似港股咁，昨日又升600幾點，成交成1500億，唔會係呃你嘅，咁嘅成交，咁嘅掃高手法，點會畀佢停？都係嗰句，專炒國企股，嚴守止蝕位（跌穿真係要止蝕喎），仍然有好多搵錢機會。

中移C輪2227：中移動（941）昨日威到不得了，升過上130元樓上，收市企喺129元，睇嚟大行估計嘅140元好快就到，破位可以睇150元樓上，可以買啲中移C輪2227，昨收35仙，槓桿率3.7倍（有效2.9倍），對冲值0.77，正股升上150元，2227應該喺52仙樓上，正股跌穿120元沽出止蝕。