難道愛愛愛愛愛對愛情已死心……噢，Sorry，唔知點解一見到民協黃虹銘（Ian），就會諗起張敬軒，可能係因為大家都眼仔碌碌，Ian承認唔少人覺得佢似軒仔，但自己就唔多覺。呢位90後還記得櫻花正開，更記得煲呔搞嘅政改起錨運動，如果冇此一役，未必踏上從政路，甚至走入法律界。點解讀law唔入公民黨？與其錦上添花，不如雪中送炭，呢位無乜民協土味嘅法律新人王，直言愛落區做服務。

睇返履歷，可能真係民協嘅「異類」。90年出世嘅佢兩三歲跟住家人移民澳洲，96年家人回流，佢返港喺深水埗嘅小學讀小一，由於幼稚園只讀英文冇學中文，「小一第一日返學，工作紙要寫姓名、班別、學號，我唔識寫，忍唔住喊」；最初中文默書真係災難，「溫咗好耐都無隻字啱，零分後又罰抄」，最終捱過咗，升去銘賢讀中學。

Ian形容中學時代成績唔標青，放學就同同學打機或打波，可以想像成績唔會好，結果家人畀機會佢去美國威斯康辛大學麥迪遜分校留學，原本讀經濟，唔鍾意政治，點知2009年前特首曾蔭權開始搞起錨運動推政改方案，忽然令呢位本來唔識邊個黨打邊個黨、覺得長毛係搞事嘅（O靚）仔，開始重視原居地嘅問題，「嗰時覺得有好唔公義嘅制度產生」，咁啱讀咗類比政治後，「攞到大學生涯第一個A喎」，自此覺得自己真係有興趣，開始想喺香港政圈發展，而政治與法治分唔開，最終政治科學及經濟雙學士學位畢業後，返港喺中大讀法律博士仲完成埋PCLL法律專業試，正式成為執業律師。

一般人覺得法律界梗係入代表中產專業嘅公民黨啦，點解反而加入基層味濃嘅民協咁奇怪？Ian話原來阿嫲搵過民協求助，自己又鍾意揼石仔做地區工作，「公民黨已經有好多專業人才，與其錦上添花，不如雪中送炭」，最終膽粗粗闖入民協辦事處自動獻身，2016年幫時為民協立法會議員嘅馮檢基助選。而家佢喺屯門區服務，唔知明年區選，係咪得到同樣快樂，輸咗亦有沮喪？