一年前，特首林鄭月娥仍是民主黨黨慶座上客，甚至捐助該黨3萬元；一年後，她不但被禁足該黨黨慶，一場《逃犯條例》修例風波，更令林鄭成為民主黨主席胡志偉痛斥的「八婆」，全黨要求她下台。其實早在政府2月推出「送中」惡法之初，胡已多次力促政府撤回修例，林鄭卻企硬不撤，就算103萬人上街反「送中」兼包圍政總，林鄭也只願暫緩修例。胡直言惡法一仗可見，林鄭管治上最大的問題，是「過於傲慢」和「自以為是」，認為拒絕下台的林鄭，必須真正面對群眾，否則民主黨必定在她餘下任期「好好招呼」。

記者 林俊謙

早在林鄭2月推出「送中」惡法之初，胡志偉已在立法會特首質詢環節，斥林鄭打開中港司法區隔，痛斥林鄭是「一國兩制的吳三桂」，促她撤回修例，4月則與黨友公開叫她下台，一向溫和的胡更在5月的特首答問會，罕有向林鄭怒吼：「妳唔死都無用呀八婆！」

「我真係覺得係（鬧得）非常之準確！」胡志偉於林鄭宣佈暫緩「送中」惡法、致歉但拒下台後，接受《蘋果》訪問，直指林鄭推動惡法，反映其最大的管治問題，是過於傲慢及自以為是，「佢覺得自己掌握嘅就係真理，其他人講嘅就當廢話」，形容過去4個月對林鄭的批評不斷升溫，源於政府未有嘗試與社會和解，更不斷加劇社會撕裂。從來不講粗口的胡志偉，直言當日是從政以來「鬧人鬧得最犀利嘅一次」：「我成日都話，我嘅燃點都算好高；如果你點得着我，嗰件事一定好大件事」，重申痛斥林鄭，只因惡法觸動了一國兩制的核心價值，「所以我唔會後悔」。

除了痛罵林鄭，胡志偉亦曾在建制派試圖召開法案委員會硬推「送中」惡法時，哭求建制派議員石禮謙不要開會。胡指，石禮謙是他的中學師兄，亦是建派中少數與泛民「有偈傾」的議員，「我自己激動，係因為好唔想喺一個自己咁尊重嘅人嘅口中，由佢去召開到一個會議，令法案會好似林鄭所想，6月底前審結」，認為在「送中」惡法審議過程中，「我都要畀個credit石禮謙，佢起碼都好大膽咁樣……叫做叫停咗個會議，令兩次法案會議不能展開……佢相對無用盡佢有嘅權力去夾硬推展。」

議會內一句「八婆」，替不少市民洩憤；議會外於6.12警方清場期間，無懼警方施放催淚彈、步向警方防線高喊「我要見指揮官！」則感動不少市民，胡坦言首度如此近距離接觸催淚彈，形容當時「唔係淡定，而係憤怒，令自己一定要向前行」，指當時得悉金鐘夏慤道在警方佈防下已成掘頭路，希望警方停止推進防線，先讓群眾安全疏散，故此堅持要見指揮官：「我其實真係唔掌握，如果（催淚彈）真係喺我身上爆會點？我真係唔知。我只記得背後、旁邊好多群眾，想佢哋（警方）畀人走」。重溫當日警方在自己面前施放催淚彈的片段，胡覺得警方當刻「殺紅了眼」，「我以為正常對警隊無威脅嘅人物行過去時，停火都係好正常嘅指示」，最終他成功走近警方防線，卻未能見到指揮官，「警方只叫我唔好阻住佢哋做嘢」。

胡志偉直言，此仗對林鄭十分失望：「如果香港一個特區，要到一百萬、兩百萬人上街，先至令到佢回心轉意，其實呢個唔係一個我哋想見嘅現象囉，個社會唔應該係咁嘅，我覺得we deserve better」。談到民主黨與林鄭的關係，胡認為很視乎林鄭是否真正願意面對群眾，「佢面對群眾嘅關係係好嘅，咁面對民主黨嘅關係自然會有改善；佢面對群眾仍然係咁傲慢、咁不可一世嘅，咁民主黨自然要好好哋招呼妳囉！」

胡強調，建制派在今次政府硬推惡法過程中要負很大責任，認為巿民應透過手中一票，對盲撐惡法的建制派政黨施以懲戒，他也認為民主派不能純粹以為「反送中」即能輕易在區選當選，「民主派自己都要爭氣，如果今次選民畀咗機會民主派當選，但民主派無認真工作守住，真誠回應社會聲音，咁係好大責任，民主派不能抱搭順風車嘅心態」。

-----------------------------
七一遊行2019
主題：撤回惡法 林鄭下台
副題/口號：重啟政改 釋放所有政治犯 撤銷暴動定性 徹查612鎮壓
日期：2019年7月1日
集合時間：下午2時30分
遊行路線：銅鑼灣維園中央草坪至金鐘政府總部
主辦團體：民間人權陣線
-----------------------------
【登記做選民 7月2日截止】

登記方法：
。親身取表填寫及郵遞
。網上登記（可用手機登入，在選舉事務處網頁打開REO-1表格，使用免費手機應用程式Adobe Fill & Sign打開表格，再按指示填寫資料，按儲存文件並以點擊分享，再電郵至 [email protected]）

詳情可參閱選舉事務處網頁：
https://www.reo.gov.hk/ch/voter/gcnr.htm

-----------------------------
7月4日起 《蘋果動新聞》只限升級壹會員閱覽
繼續撐蘋果！