鄭欣宜、Super Girls、丁子高同森美等今日去到香港迪士尼樂園酒店參與「東華三院萬聖節反轉樂園慈善跑」記招，宣傳11月3日在樂園內舉行約3公里慈善跑，為支援有特殊學習需要兒童及青少年發展籌募經費。活動上森美自言從小有專注力不足及過度活躍，可惜當年社會冇呢方面支援，佢又笑指現時仍會不自覺打斷人話柄，所以平時開咪時窒人非自己能控制。

斷腳後仍未完全復原的欣宜（新聞連結： https://bit.ly/2hpES95 ），雖然未能落場跑，但如果當日冇工作，佢話自己一定到場支持，現時需要接受物理冶療，平日會做游水及水中踩單車等冇撞擊運動。欣宜提到日前到馬來西亞宣傳新歌，佢因為貪靚而堅持換高踭鞋上台獻唱，佢話：「估唔到當地fans咁熱情，希望可以將演唱會帶過去，雖然通告好忙，我臨走前點都抽時間去食榴槤，過關時仲咬住條榴槤雪條。」欣宜指自己是貓山王代言人，講到係咪榴槤公主？佢即反問：「王后得唔得？」

至於Super Girls指現時比入行初期已經好跑好多，今次將會有小朋友參與，佢哋計劃肩負跟小朋友玩嘅重責，問到講得興起嘅吳嘉熙（Cheronna）會否計劃生B？佢思考片刻答：「我諗玩人哋啲先，暫時未照顧到。」Super Girls指成員中最識照顧小朋友嘅係趙慧珊（Aka），Aka解釋自己有教小朋友畫畫及跳舞，事前要上跟小朋友及家長溝通課堂，所以有一定認識，旁邊姊妹們即提出將來將仔女交給Aka教導，Aka笑言咁樣會變得太忙。

精選娛聞，喺晒《娛果》
http://fb.com/appledailyent