一年一度嘅美食博覽明日起一連五日喺灣仔會展舉行，小妹已經約埋成班姊妹去掃貨，今次目標係搶購啲$1貨品，所以預早做定功課搵定目標，好多都係限量發售，行錯展廳去錯攤位就執輸啦。
好似幾屆都有參展嘅健康品牌康維他（展覽廳1A，攤位E09A），今年首次推一蚊雞優惠。康維他公關哥哥Purry話，今次會以王牌產品康維他UMFR5+麥蘆卡保健蜂蜜250克（原價$119），同埋康維他潤喉糖12粒裝（原價$49），以$1發售，各款每日售100件。買完走去隔籬嘅燕之家（展覽廳1A，攤位B30），以$1買原價$23嘅燕窩飲品，包括燕窩楊枝甘露、燕窩冬蟲夏草等，每日限售50樽。

1B展覽廳$1隻蟹

飲順條氣，再撲去有唔少$1產品展覽廳1B，好似上屆以一蚊雞打響名堂嘅優質堂（攤位B26-27），今年繼續以$1促銷唔同嘅海產，開幕日以$1銷售北海道幻之蟹一隻（原價$510），限售10份；15日以$1賣1條日本宮城三文魚刺身，同埋北海道珍寶帶子，各20份。恆興行（攤位A07）$1賣黑糖薑蜜，每日限售100份。
想搵熟食，義生洋行（貿易館展覽廳3B，C11-C13）喺14日下晝兩點，推出$1隻意大利樂其雅松露菌蒸鮑魚，名額100個，仲係由王子飯店廚師親自炮製。

電郵：mailto:[email protected]