唔知係唔係新飛龍拖泥帶水嗰三條綵帶累事，上海世博嘅香港館，未剪綵，先「攞彩」。繼08年奧運馬術賽前目擊假天花板條條Fing事件之後，政務司司長唐英年又有幸見證上海世博香港參展內容嘅蝦碌嘢。身在上海嘅唐唐噚日call行記者參觀香港館同埋城市最佳實踐區嘅香港展覽，試玩「智能卡」多媒體遊戲，點知變咗低智能表演。
嘥咗香港人成三億幾嘅上海世博香港館，仲有11日就獻世。特區政府高官最近輪流上去督師，幾日前，商務及經濟發展局局長劉吳惠蘭先視察過場地，話對展館佈置進度滿意，仲拍晒心口話會確保喺展出前做好充份準備，點知留低咗條蕉皮跣到唐唐應一應。

香港展區試玩失靈

劉太應該唔係有心嘅，不過香港館又真係尚待努力。唐唐噚日一如既往笑口噬噬咁，率領成班記者到香港展區。開頭唐唐都玩得幾開心，點知玩多兩玩就開始哋。原因為，佢喺鏡頭前試玩「智能卡」多媒體設施嘅時候，嗰啲咁嘅智能玩意，一係冇反應，一係遲幾拍，搞到唐唐戇居居懵盛盛唔知點好。
唐唐之後回應記者，話展覽設施喺軟件方面會進一步微調，利用未來幾日嘅試運期優化設施。微乜嘢調？優乜嘢化呀？修正就修正喇。有冇人屋企部電視壞咗，會同個維修佬講，唔該幫我優化一下部電視咁？
不過唐唐唔使介懷，佢應該乘機領功先啱。事關司長佢係執漏之王，想當年香港辦奧馬，開幕前招待記者參觀，喺採訪區講講吓嘢，假天花板突然塌落，有條喉管跌咗落嚟條條Fing。證明香港冇咗唐唐唔得，若然唔係靠佢得閒巡一巡，香港真係隨時成為國際笑柄。

發揮冷面笑匠本色

講返個香港館，唐唐話希望能夠爭取可以在原地永久保留，但係阿爺未答應。如果唔能夠保留的話，會點樣處理呢？呢個時候，唐唐發揮佢一貫嘅冷面笑匠本色；佢話：「我哋有幾套方案，第一套優先方案當然係爭取原地保留。」可能佢吸收咗菜園村村民嘅永不放棄精神，否則八方真係唔明佢噏乜。

mailto:[email protected]