荷李活影星尊尼狄普（JohnnyDepp）被太太安芭赫德（AmberHeard）單方面向法院申請離婚，之後安芭再上庭指控遭尊尼家暴，呢單案雖然有人懷疑安芭屈尊尼想分多啲錢，不過今日安芭方面繼續反擊，喺最新一期《People》雜誌刊出安芭去聲稱去年底被尊尼打傷嘅傷勢照，指被尊尼多次家暴。

美國娛樂網站ET今日亦發放聲稱係安芭同尊尼助手StephenDeuters喺2014年5月嘅短訊來往，係佢哋結婚之前。內容係Stephen代某人向疑似安芭道歉，指「他」感到好內疚，想變得更好。指出「他」曾踢安芭，「他」知道之後很震驚及忍唔住喊。疑似安芭最後寫到「他」之前試過好多次係咁，喺東京、小島、倫敦。


以下係疑似助手Stephen同疑似安芭嘅對話:

Stephen：我諗佢剛剛傳訊息俾你，佢好內疚，佢知自己做錯，佢今朝講到明想變得更好。認為我哋喺一個好重要嘅關口。

安芭：係，但係佢噚日咁對我之後，我唔知可以再點同佢一齊。我唔知仲可唔可以同佢一齊。

Stephen：佢真係好想見你，佢好心痛。

安芭：唔使擔心機票，我可以照顧自己。嗱，佢根本就認為自己唔值得受咁嘅對待，但係好明顯佢唔知自己做咗啲咩，同埋程度有幾大。如果有人好誠實咁同佢講佢究竟做咗啲乜，佢一定好震驚，佢一定唔會同我講佢唔值得受咁嘅對待。我感到傷心，因為佢冇一個更好嘅方法知道佢噚日做嘅事究竟有幾嚴重。我就好唔好彩，我記得晒發生嘅所有細節。

Stephen：當我同佢講佢踢你，佢喊咗。呢樣係好嘔心嘅事，佢自己都知，佢send第二個短訊時我唔喺佢身邊，佢讀俾我聽之後我同佢講唔應該send，佢之後send完第三個短訊後就坐喺張床度喊。佢係個迷失嘅小男孩。佢需要人幫助，佢亦感到好抱歉，佢係應該感到好抱歉嘅。

安芭：佢之前都試過好多次，東京、小島、倫敦（你記得嗎？）而我都有留低，我深信佢係會變好....