其實工業股都沉寂咗好耐,個市一路創新高都無反應,主要原因係資金唔到位。好似震雄,往績PE只係10倍,而且財政極佳,截至9月底止現金增至3.2億元,銀行貸款由1.77億大減至3400萬元,如果沽咗啲中資股,不妨睇位收集。
往昔基金工業股似乎輪流炒,其中一隻係去年底忽然被洗倉式沽售嘅精電國際(710)。精電12月初連跌6日,跌幅近1元,去到谷底嘅時候,卻獲法巴雪中送炭,唱好叫買,先至反彈番些少。
法巴表示,該行與管理層會面後,相信公司業務正在復蘇,正在虧蝕的手機顯示器業務,11月取得超過100個客戶的定單,業務大有改善,相信來年該部門會轉虧為盈,重申買入評級,目標價6.58元。昨精電收3.90元,潛在升幅68%,𠵱家睇嚟,似乎誇張咗些少。
集團截至今年6月底止的中期業績,錄得盈利9019萬元,較05年同期倒退8%,每股盈利0.2797元,以此計算若下半年度盈利相若,PE約6.9倍,再扣埋淨現金每股0.93元,現價似乎真係幾平。
歐陽風