劉威煌今日喺觀塘做義工，向長者派飯盒及水果，佢話一向都有做義工嘅習慣，唔介意冇酬勞。

劉威煌透露今個月會約滿林盛斌（Bob），之後就會自由身，唔會簽死一間公司，2018年重新開始。問到點解唔續約？佢話：「呢個係我決定，佢哋係持開放態度，其實做每首歌都要成本，不過公司唔夠budget，唔夠宣傳，但我又要高質素嘅嘢，我都明白冇公司想做蝕本生意，所以撇除合約，我同Bob可能仲有其他合作，有更多發展空間，因為Bob間公司喺香港係做製作，藝人只係得我一個。」劉威煌強調同Bob係完美完約。怕唔怕少咗收入？劉威煌話：「唔怕，如果有人幫我接job，到時都係分賬。」

講到佢嘅珍珠奶茶生意，劉威煌指生意唔錯，但有件事要澄清：「其實呢個品牌唔係我，我只係加盟咗其中一間分店。」佢又指最近去咗台灣，同某個飲食品牌傾合作事宜。

更多娛聞，喺晒《娛果》
http://fb.com/appledailyent