陳嘉寶(Anjaylia)日前同闊少男友黃頌祈(Epaphras)拍拖，都係揀好平民化嘅榮記食車仔麵。

《蘋果》今日打俾Anjaylia，問佢係咪好鍾意食車仔麵時，佢話：「其實我乜都食，好食就食，車仔麵我成日都去。」Anjaylia又話因為佢哋都係普通市民，都係做番日常生活會做嘅嘢：「如果做嘢就會着到好靚化到好靚，去啲好靚嘅地方，唔係做嘢大家都係過番啲普通人生活。」

問佢係唔係好享受拍拖生活？Anjaylia直言:「都係嘅，不過有時周年慶祝、朋友生日聚會，耐唔耐都會去啲靚啲嘅地方嘅，但平時覺得自己都係普通人，都會去一啲自己鍾意食嘅地方，同埋魚蛋車仔麵都好好食吖，我鍾意呢啲多過食翅。」

講到佢男友有錢，但唔係成日喺有錢人地方出入，Anjaylia解釋:「佢好努力做嘢嘅，以前細個都係做modeling賺錢，跟住自己創業，一路投資，同埋佢唔係一個大使嘅人，大家都好實際同埋好努力，有時唔係一定貴嘅嘢先至好㗎嘛。」Anjaylia咁識諗，邊個男人娶着佢真係好幸福！

問佢約滿經理人公司之後搵到新公司未？佢就話:「我見咗成7、8間公司，o依家有一、兩間比較傾得埋，要進一步傾緊，希望好快有好消息啦。同埋我籌備緊下個月會出本書，想試吓如果冇經理人跟，自己一手一腳打理又會點呢，喺未有經理人之前，呢個都係個寶貴經驗嚟。」