前冠軍練馬師葉楚航剛周日（16日）連中三元，風頭之勁一時無兩，現以14Win穩守成績榜中游位置。

葉楚航馬房周三（19日）晚賽駒今晨（19日）相繼接受操練打磨，《蘋果馬經》晨操專家積奇特別品題「深愛」及「旅遊首席」，認為牠們的狀態已達勇境。

第四場四班1200米「深愛」今季跑過四仗，大前仗角逐四班1200米泥地，僅以頭位不敵「軍力勁」屈居亞軍。上仗在谷草三班草地1650米跑獲第三，賽後居然被減一分得以重返四班角逐入Q途程，認真着數。

「深愛」今朝由田泰安跳兩段，無戴任何配件，沿欄小心翼翼扣實，受操控唔性急搶口，馬身甚靚，墜手步闊有力，過終點表現仍淡定。

另外，第六場三班1800米「旅遊首席」上仗作季內第三戰，跑泥地1800米即大勝對手收韁贏馬，姿態滿分。今次續跑勝途，絕對有力再增頭馬。

今朝「旅遊首席」由拍檔蘇兆輝跳兩段，戴眼罩走中檔，全程按住順走，直路稍加快，步幅開揚有力，馬身壯碩體力充沛，保持最佳狀態。