當年今日
關於我們

【無懼寒冬】麥家琪露前又晒背羅霖話網購生意好

蘋果日報 2016/01/20 06:00

蘋果羅霖即時麥家琪

羅霖、陳蕊蕊同麥家琪今晚去咗荃灣出席一個內衣品牌活動,個個都無懼天氣凍性感上陣,睇落又真係好養眼。

近排蕊蕊傳金剛分手,見到佢冇乜表情,似乎有啲心事?不過佢話:「冇嘢呀!肚餓啫,頭先我趕住過嚟,人又未ready。」佢仲再三否認因為金剛攬女而分手:「我哋冇嘢,佢同唯唯拍節目,嗰個人係節目嘉賓,我知道係做嘢,冇呷醋,其實做嘢唔係男仔就女仔,不過我未睇報道,金剛已經主動講,可能佢怕我誤會,咪解釋俾我聽。」

聽落佢都好緊張你喎?蕊蕊話:「ok架,唔知點解會有咁多傳聞,可能有節目出街,當係宣傳。」之後問佢係咪會搬?佢話:「我冇諗過搬喎,0依家係睇緊新年駛唔駛開工,如果唔駛開工咪陪金剛返台灣過年。」

好少出席活動嘅麥家琪,原來佢都有接內地工作,仲話呢個係訓練仔女獨立好機會:「0依家啲仔女開始大,啲功課有人陪幫手睇,所以撞啱時間都會拍嘢,咪當係訓練吓佢哋獨立,當然有啲時間都要自己陪佢哋。」家琪仲話:「哥哥ok,0依家係細佬搵小學未有著落,有啲煩。將來我都會送佢哋出國讀書,但唔會咁快,想佢哋學好啲中文。」

啱啱搞咗個網站賣嘢嘅羅霖,成日見佢好勤力出席活動,佢笑笑口話:「唔去多啲活動點得,我想新年同佢哋去旅行。」佢仲話0依家網站生意好,遲啲仲可能會出埋內衣褲,不過佢話:「係有呢個打算,但係唔會印樣,當然係實際用途好啲,有啱我自己都會訂嚟用。」

採訪:王連連
攝影:陳順禎