公民黨同社民連五位議員重返議會，噚日再宣誓就職，唔少泛民主派議員都以擁抱同握手方式祝賀五子凱旋而歸，曾經離場導致流會、阻止五人讀辭職宣言嘅建制派，今次好克制唔敢玩鋪勁，冇再次集體離場。

王國興批曾鈺成縱容

社民連三子在誓詞加料有前科，長毛讀到效忠中華人民共和國時重複三次「中華人民」，擺明效忠人民而唔係中共，又高叫「廢除功能組別」同「2012雙普選」等口號；大嚿就諷刺在座建制派聽佢哋宣誓，難道係確認公投結果？激到民建聯幾位仁兄紮紮跳，陳克勤、劉江華、張學明同譚耀宗即時黑面離場，李卓人即時要求點算人數，最終由一直冇入過會議廳嘅李慧琼犧牲小我，化解流會風波。
以國語宣誓嘅毓民最聽話，叫幾句口號就收檔，唔少建制派話估唔到今次佢最乖。工聯會王國興批評社民連三子之餘仲直指主席曾鈺成「有法不依」，不滿主席縱容佢哋亂加料。謝偉俊就趁機同至愛報仇，喺五人宣誓時展示請願牌，轟佢哋浪費公帑。