參選特首嘅唐英年，造勢大會因為早前花園街大火要延期，點知改喺噚日舉行，仲畀佢撞正北韓領袖金正日死訊。八方趁造勢大會開始前，問唐英年會唔會擔心金正日死訊令佢嘅造勢會曝光率大減，佢冇正面回應，但就竟然笑笑口，仲講咗句：「佢疲勞吖嘛！」

根據北韓官方報道，金正日係因為疲勞過度，上周六喺列車上突然去世，唐唐嘅回應顯示佢再忙都有睇新聞，不過唔知佢準備造勢會又疲唔疲勞呢？唐唐又笑住話：「我唔疲勞，我啱啱先開始跑……」不過，之後有記者認真問佢點睇金正日之死對中韓關係影響時，佢即時封口走人。
北韓人一直好崇拜金日成同金正日兩父子，到底有幾狂熱﹖去過北韓嘅港人唔多，八方惟有請教剛去過北韓首都平壤旅行嘅挺唐IT人項明生。佢今年9月先去過北韓，佢話當地街燈唔係好好，平時行街，見到最光、最多燈嘅地方，就一定係照住金日成、金正日父子嘅相片；更誇張嘅係，項明生去到金日成紀念館，竟然仲有北韓婦女喊唔停。難怪金正日死訊一傳出，電視畫面係北韓全國上下失聲痛哭。