賭王四太梁安琪、徐濠縈、羅君兒、「四叔」李兆基嘅兩外孫女李敬儀同李敬恩等今晚現身灣仔君悅酒店出席Tatler Ball。

阿徐徐濠縈透露中秋節可以一家團圓慶祝：「老公返嚟，可以同個女慶祝生日，今年中秋係包包正日生日，希望一家人一齊過賞月，嚟緊Eason有迷你tour，喺內地，為節目下個禮拜上去，飛到佢都唔知喺邊度。」之前，Eason喺台灣身體不適要提早返港，阿徐就笑兩父女輪流病：「老公睇完到個女，我頂住頭家，可能我有做運動。」

記者笑言阿徐要喺屋企做阿四，佢就話：「都係湊佢哋睇醫生，叫佢食藥，個女唔聽話，可能學爹地捱夜，夜瞓易病，可能運動唔夠。」問到囡囡生日要咩禮物，佢表示：「佢想要新電話，都係用我啲舊電話，環保啲，佢哋唔使用咁新，我反而想整個靚啲嘅蛋糕俾佢，上年都係我整。」

另外，李桂蘭嘅囝囝、謝婷婷嘅舊愛戴尚安就同女伴到場，佢介紹對方係日本名人Angela，問到係咪女友？佢就甜笑指對方只係朋友。

太子珠寶鐘錶老闆鄧鉅明夫婦稍遲到場，談及早前有金行遇劫，鄧稱：「佢哋夾硬嚟都好無奈，可能覺得出邊好難搵食，但過去10幾年好少打劫架啦，自己唯有小心啲囉。」鄧太又話：「呢個係我工作嚟，我已經發咗通告0架啦，生命係最緊要，要小心開舖閂舖，安全最重要。」

林恬兒就稱今年中秋節加埋9個月大細女將會過得好熱鬧，又話囡囡好活潑，自己好鍾意同個女扮靚。會唔會再追多個？「我哋非常鍾意小朋友，不過過多幾年再算啦。」林恬兒稱自己手頭上還有工作，但依家佢餵緊母乳，所以比較困身。