NBA快艇後衛D鍾斯（DahntayJones）因為喺禮拜日98:106不敵勇士嘅賽後，喺祖蒙特格連（DraymondGreen）接受訪問時撞向他，畀聯盟罰款10,000美元（約77,000港元）。鍾斯聞判後表示會上訴，堅持自己只係唔小心，佢仲話格連係刻意小事化大，目的係要令佢畀人罰錢。格連當然唔會就咁算數，直指鍾斯擺明撩事鬥非，但佢唔會咁蠢中計：「我畀人罰停賽同佢被罰停賽，兩者之間差別太大，鍾斯停賽，啲人根本可能唔會發覺。佢咁做至少可以上到鏡，佢係需要呢啲曝光率嘅，因為佢通常坐喺後備席，好少見到佢。」

另一方面，快艇教練李華士就力撐鍾斯，仲乘機串埋格連一份：「鍾斯呢嘢真係離譜得過份，實在撞得太大力啦，我以為格連好硬淨，但從佢嘅反應嚟睇，呢嘢可能真係撞得佢好痛。」

↓D鍾斯撞祖蒙特格連↓
http://bit.ly/1KNeFbH