沙田馬場今午（25日）只得第五及第九場跑泥地，途程都是1200米。結果第九場二班1200米泥地賽，一如第五場（頭馬「龍城猛將」排3檔）般，亦由內檔馬勝出，主角「公証揚鳴」排第4檔起步，此駒夥拍騎師田泰安轉投方嘉柏馬房初出即贏，單Win及組合獨贏A1分別派62及20元。

五歲馬「公証揚鳴」本由呂健威馬房訓練，上季出道冇馬贏，早排拉倉之前，馬兒今季只兩戰得一冠一亞佳績，但馬主莫淦鴻與莫鈞源，最終仍將此駒拉走轉至方嘉柏。

「公証揚鳴」休息逾三個月後今日復出，續跑賽前不失Q的泥地短途1200米，運用留前鬥後策略，沿途居中，末段以勁勢從中叠一條氣殺上，完全冇馬擋到佢，就此贏一馬位，打響轉廐後頭炮，兼保持季內及泥地非冠即亞，而方嘉柏亦繼早前「大輝寶」後，再替一匹呂健威來投馬一出即勝，從而擦亮招牌。

「公証揚鳴」久休逾三個月，主要關乎3月下旬仍在呂健威馬房時試閘流鼻血，巧合的是今場順序跑第二、三名的「飛龍駒」、及「添好運」，均有流鼻血或心律不正常紀錄。而第四名為「藍天堡馬」，四重彩派一萬五千幾。