最新收視已經出咗，就連噚晚播出嘅《超級無敵獎門人——終極篇》收視都出咗，平均收視係27點，即約173萬人次收看，如果計平均數，就係上周全台最高節目。如果單單計唔同時段收視，咁最高就係有28點（約179萬人次)嘅《情越海岸線》喇。咁梗係啦，成個劇又有情慾，又有事業線，又有李詩韻胸頂舊愛鄧健泓背脊，嘩，幾好睇呀。

講番《獎門人》收視，上一輯已經係2010年，依家再出，都有27點，算係唔錯0架喇。平心而論，次次獎門人搞親嗰啲出埠外景，遊戲可觀性都係一般，通常焦點都係集中於女藝人嘅身材之上，極盡視覺之娛，但今次，即使有MandyLieu同高海寧都出咗場，但都冇乜「肉食」喎。有網民一邊睇一邊留言嗌悶，唔吸引，來來去去兩度板斧；亦有人話: 「明知唔好睇，都會睇落去，因為始終都係有情意結。」

之不過，網上亦有一啲頗為離奇嘅留言，例如，話獎門人係抄韓國SBS電視台著名遊戲節目《RunningMan》……《RunningMan》係2010年先有，《獎門人》係1995年已經有喇喎。

網民提到嘅抄襲，除咗係話《獎門人》畫面上有啲加強氣氛嘅細字如「緊張」同《RunningMan》一樣，而且兩個遊戲都係去到一個特定地點進行遊戲。亦的而確，《獎門人》有啲遊戲(至少兩個)，係同《RunningMan》幾乎完全一樣，無論玩法定懲罰，都係一樣。有人更話，就連拍攝角度，都幾乎同出一轍。

無錯，《獎門人》確係早過《RunningMan》出，但係後者越做越好，鬼主意多多，收視亦爆紅，《獎門人》「抄考」後浪，亦不足為奇。而且《獎門人》當年首推出之時，亦被指集台、日兩地綜藝節目玩法之大成再改頭換面，「抄」，已不是新聞。

咁當然啦，有《獎門人》嘅fans就話，之前都有出埠拍特輯玩遊戲；而且《RunningMan》類似快閃遊戲，例如喺一個地方，預先set好晒嘢、吸引一眾途人圍觀，然後大夥兒就喺嗰個location玩足個幾鐘，例如向途人收集飲過嘅咖啡杯進行投籃遊戲，玩完之後就作鳥獸散，但噚晚嘅《獎門人》，好明顯係已經清場錄影。

亦有《獎門人》死忠fans話: 「同一遊戲，唔同人玩就會有唔同笑點，毋需要批評抄乜扮物。你有你鍾意睇《RunningMan》。我有我支持咗十幾年嘅《獎門人》。」 、 「香港人做番個綜藝節目，起碼我都唔使睇字幕。」、「依家有新證據喇，知道獎門人坐時光機抄《RunningMan》喇。」