最近我阿利睇報紙，話上年財爺收稅收到手仔軟，莫講話財赤唔見咗，就算派幾封利市仔減吓稅都仲得。唔怪得份份報紙都叫財爺可憐吓我哋呢班小市民。
見到政府收咁多錢，我阿利真係想叫財爺高抬貴手，唔好諗話開徵銷售稅。全世界有銷售稅嘅地方，係人都知買嘢貴到暈，搞到個個牙痛咁聲。人哋啲鬼佬地方有啲特別嘢，點貴都有人忍痛買，但係香港自己生產嘅，只有老婆餅，你叫啲遊客市民又有乜嘢原因響香港入貨？

會計佬非始作俑者

講開啲乜稅物稅，我隔籬左右嘅師奶麻雀腳個個都指住我個鼻鬧，話我哋呢班會計佬實生仔冇PatPat。咁惡毒，皆因佢哋以為會計佬就係乜稅物稅嘅始作俑者。好彩我阿利仔大女大，自己副偈老早唔聽使，唔怕佢哋啲師奶毒咒。
查實我阿利都諗唔明，銷售稅有啲乜嘢可以益到我哋啲會計佬。銷售稅淨係響啲零售層面加來加去，又唔係增值稅，增值稅就話要層層計數，計少浸都話你逃稅，會計佬就可以搵嘢嚟做，就好似英國歐洲一樣。如果以為銷售稅係我哋班會計佬為求自肥有心靠害，就真係冤枉大老爺。
查實好多會計佬都反對銷售稅，我阿利就係其中一個。