著名清談節目《The Tonight Show》名嘴Jimmy Fallon上電台節目,除咗重提自己曾被妮歌潔曼暗戀,仲講咗當晚發生咩事,原來一切全因佢掛住打機!年前妮歌潔曼上Jimmy Fallon節目,就突然自爆曾經企喺廚房等對方問佢電話,嚇到Jimmy唔識反應。最近佢上電台被重提舊事,佢就再講返當晚發生咩事。「當日有個我地嘅共同朋友Rick,問我可唔可以帶埋妮歌上嚟傾公事,當我一開門已經呆咗,佢真係好靚,全世界最靚嘅女人竟然企喺我屋企!」當年妮歌正正被雜誌選為全球最靚女人,而Jimmy呢一刻竟然掛住打機!「我開咗部遊戲機,教佢一齊玩《瑪利奧賽車》(Mario Kart),最後玩咗個幾兩個鐘。」根據妮歌所講,佢見對方掛住打機都唔同佢傾計,就以為對方係gay所以冇出聲,再之後發生埋廚房食檸檬事件,佢只好死心。諗返起呢件事,Jimmy只能感嘆:「我根本冇諗過我會有機會被妮歌鍾意……」最後Jimmy就同咗而家嘅節目監製結婚,妮歌都同咗歌手Keith Urban一齊。