上周五美市中段，市傳華府將連發三招：一、限制退休基金投資中國；二、限制指數（如MSCI）加大中國的比重；三、勒令美國掛牌的中資股退市，但美國財政部已否認。當晚中概股全線插水，阿里巴巴、瑞幸咖啡瀉半成，百度挫3%，騰訊（700）ADR亦跌2.7%。見此消息，無論閣下反應係「燒炮仗」抑或「騰騰震」，客觀分析一下，就知成事機會甚微。

先講退休基金，關乎美國數以千萬計退休人士的福祉，目前中國佔全球經濟增長約三分一，佔比較美、歐、日三地總和還要多，棄投中國大有可能降低退休基金的投資回報，芬佬賺少咗，真係同你死過。

至於MSCI等美國指數，你可以唔加比重，但富時羅素（FTSE）如果一路加上去，MSCI的認受性會逐步下降。換個角度睇，這也是為何港交所（388）不惜代價也要鯨吞倫交所──幫阿爺打通資金渠道、提升人仔地位。

踢走中概股方面，月前已有所聞，也是三者中相對可行，否則為何阿里要回流第二上市？但中美貿談在即，此時特朗普興風作浪，似是談判伎倆居多，真係落實的話，得罪一眾華爾街大帝及退休長者，明年連任將凍過水，你話侵侵會否如此冒險？

本周北水暫停，美滙又實在太強，港股續弱機會大，下方支持暫在25,300，但熊仔清得七七八八，25,500樓下不宜再追沽了。

筆者為證監會持牌人，未持有上述股份財務權益。
魏力
www.facebook.com/2012jason