除咗舒娃之外,到場嘅體壇明星仲有美國國家足球隊嘅丹普西,同埋效力NBA雷霆嘅杜蘭特。丹普西都叫有份獲獎,「最佳一刻」獎項,網民選咗世盃分組賽美國贏加納呢場波,丹普西仲喺開賽冇耐就先開紀錄,助美國最終2:1贏波。至於杜蘭特就仲威,獨攬「最佳男運動員」同埋「最佳NBA球員」兩個獎項,佢喺拎獎嘅時候,又再一次多謝媽媽同埋佢隊友韋斯卜克,真孝順又夠義氣;韋斯卜克亦有獎拎,獲得「最佳捲土重來」獎。另一個獎項「最佳決賽表現」就由總決賽MVP,馬刺嘅尼納特贏得;而教練普波域治就獲選最佳教練。
當晚頒發嘅獎項多不勝數,其餘獎項包括有:基斯坦奴朗拿度獲選「最佳國際運動員」;「最佳男網球員」係拿度;同埋「最佳拳手」由美韋特贏得等等。