【楚雲聲】明日白色情人節 睇住「北極光」最浪漫（Cloudy）
蘋果日報 2020/03/13 20:40
紅星北極光英明勇將Cloudy楚雲聲
北極光上仗初出排10檔跑第二，今次再出排5檔，續配潘頓力求補中
又嚟到3月14日白色情人節，有唔少人乘機表白示愛。當然，傳統就係還對方一句受定唔受，最好就梗係櫻花樹下共浴愛河啦！
表得白、示得愛嘅，總有多少自信，滿心歡喜期待住擁抱美滿將來。不過如果最後被拒，就連紮花都蝕埋。
情況同買馬一樣，有足夠信心你就會落注。等跑嘅過程會係比較緊張，但跑完都未駛點等到覆實個磅，都知係搣飛定收錢，所以「祝你好運」係成日都聽到。
周末（14日）第二場四班1200米草地，個名夠晒浪漫嘅「北極光」上場（1日）初出外檔三叠照樣入Q，再出有經驗又無咁劣勢，繼續揀得過。
呢隻馬身壯色靚，今次對手又無加強，仲隨時守黃金包廂位，絕對係爭W馬。
「英明勇將」老馬未退，季內識近，朝早仍見火氣。今場撞正質新分子居多，1檔慳住賺住追，都好夠跑。
「上校」一直保持，可惜重返田草又執外檔，希望除眼罩會留到半秒方便泊車，如果攝到二叠，入圍唔難。
「紅星」刻意落四班玩，搵番黃俊兼晨課好力，我又唔敢飛起佢啦！
呼應番今次，祝大家人財兩得，求愛以及跑馬嘅賽果都唔好爆冷。