舊年民主派喺選委會選舉報捷，催生嘅公共專業聯盟噚日正式成立，聯盟用隻「單眼」做logo（圖）。
副主席莫乃光解釋，隻眼唔係代表專業人士只着眼自己利益，而係放眼社會。佢話呢隻眼取自古埃及鷹頭人身嘅法老王守護神「賀魯斯之眼」，象徵有治癒重生能力同洞悉一切嘅智慧，提醒專業人士要時刻維護公眾利益。
有個神話傳說指，賀魯斯（Horus）係冥王歐里西斯個仔，相傳歐里西斯係遠古時代明君，後來俾細佬塞特殺死奪權，賀魯斯同塞特開戰為父報仇，最終戰勝奪回王位。專業聯盟用賀魯斯隻眼明志，唔知仲有乜嘢微言大義？