姚子羚同李施嬅（前名：李詩韻）今日都有出席好姊妹胡杏兒婚紗店開幕活動，兩女身穿低胸婚紗示人，相當性感﹗

講到姚子羚同「的士闊少」男友鄭子邦感情穩定，有傳佢哋可能搶閘今年結婚，同子羚一齊住嘅龔嘉欣，之前仲呻可能要捱貴租，不過嘉欣話結婚係開心事。但係子羚就否認婚事，佢話：「冇啲咁嘅事，胡杏兒又未嫁，胡定欣又未嫁。」

嘉欣話驚捱貴租，子羚話：「0依家仲要儲錢買姑婆屋，邊有咁快嫁，男人有錢唔關事，女人都要有，女人點都要有私己錢。」

想同嘉欣一齊買屋？子羚話：「有傾過夾份買，就算唔一齊住都可以當投資，大家都想將來有間屋可以聚下。」提到鄭子邦，子羚竟然將對方降grade為「義工朋友」。