孫燕姿已經有一段時間冇喺香港開演唱會，噚日佢穿着Fendi嘅秋冬裝，喺尖沙嘴舉行演唱會記招，宣佈明年2月5日至6日喺紅館舉行「答案是……孫燕姿2010世界巡迴演唱會──香港站」，今次仲搵咗阿叔張叔平做服裝指導，而且喺舞蹈同舞台設計都會有新嘗試，記者會上燕姿手執武士刀，喺4個武士嘅襯托下出場，燕姿喺台上亦大讚阿叔話：「以前我不會穿衣服，好像鄰家女孩一樣，不過今次有新突破，尤其在視覺上，有點另類感受。」
聽講燕姿嘅演唱會好受歡迎，內部認購同信用卡預售都好快爆滿，燕姿話佢事前都冇諗過，可能佢喺香港有一段時間冇開騷，加上喺內地又有fans話會嚟香港買飛問燕姿有冇打算加場。

多舞蹈怕唔夠氣

燕姿話：「要由主辦單位的決定，不過今次會有很多舞蹈，我怕會很累和不夠氣，所以我想最多只會加兩場。」又問到燕姿會唔會着性感嘅舞衣，佢低頭望咗一望話：「很難，怎樣性感呀？聽歌比較好，身材沒有得看。」
雖然燕姿一向低調處理感情事，問佢男友會唔會捧場時佢話冇請，後來記者再問佢有冇因為巡迴開騷而俾男友投訴見面少？燕姿即刻大發嬌嗔地說：「跟他沒有關係，不知怎樣說呀！不要問男友，只問演唱會的事。」