香港人口女多過男，搞到剩女數量唔少，但原來喺政治動物之中，女性竟然唔及男性多。以民主黨同自由黨為例，兩黨男女都係7比3，為咗平衡陽盛陰衰現象，佢哋都想招收多啲女黨員加入，培養出人見人愛兼可以吸到選票嘅亮麗黨花，照計唔會有政黨拒絕。

獎賞計劃派現金

唔似相對年輕嘅社民連同公民黨咁生力軍數埋一大把，民主黨近日就訂出吸納女黨員目標，仲仿效保險公司同健身會嘅方法，推出類似獎賞計劃，鼓勵現有成員介紹新人加入。
民主黨自從卿姐加入之後，覺得女黨員人數同參與黨務比率都較低，黨內性別平等小組建議招募更多女黨員，仲提出獎賞計劃，每季招募最多女黨員嘅地區支部可獲現金獎勵，全年招募最多女黨員嘅支部，仲額外再獲得獎金。
據講獎金每個人頭約500蚊，而最低要求係踢到五個女性入黨先可以攞到獎金，但獎金只係交畀支部，用嚟推動會員事務。民主黨現有逾600個黨員，男、女比例約7比3，八方打聽過其他政黨，都差唔多，即係陽剛味重咗啲。公民黨就比較平均，相信同幾個大狀都係女性，較易吸納女性入黨有關。自由黨喺主席劉健儀之下，女黨員亦只佔三分一，黨花數量有空間增加。

自由黨吸引靚女

前日搞嘅摑警案遊行隊伍之中，有一位舉牌嘅女子相當突出，佢外表溫柔，但拎住寫上「窮人含X」嘅標語參加遊行，齋睇標語可能以為佢係社民連嘅人。查實佢叫方亮瑜，稍後通過田二少面試一關，就正式加入自由黨。英文名叫阿Jade嘅方亮瑜話唔係想講粗口，強調紙牌個「X」可以代表「怨」、「淚」同「恨」喎。
睇阿Jade樣貌甜美唔好以為佢得個殼，佢港大文學院畢業，兼且仲有中醫資格。最特別之處係佢出身於玄學世家，由於受到家人薰陶，自小已經醉心陰陽五行學說。據講佢12歲就開始學八字命理、紫微斗數同堪輿地理。如果佢成功入黨，日後仲可以幫街坊免費指點迷津，吸票兼吸納新黨員。

mailto:[email protected]