惠英紅剛於上月底憑《血觀音》，奪得金馬影后，為港增光。( 新聞連結： http://bit.ly/2ibabF4 )，該片今日喺香港有十二間戲院上映，票房票截至晚上七點半，已有3.8萬，成績不俗。而影評人皮亞對該片嘅評價：「劇力很強大，大富之家三母女血肉相殘，為錢為愛為生存 ，女人的狠勁過男人黑社會，好睇啊！惠英紅做得幾好啊 ，口口聲聲說愛你，其實心狠手辣。」小紅姐今接受《蘋果》專訪，就講到套戲返到嚟本土，當然唔想我丟架，佢仲揭開減收片酬接拍《血觀音》之謎！

着上黑銀色連身裙嘅小紅姐，仍難掩佢臉上嘅喜悅，《血觀音》今日上映，問到小紅姐可可擔心香港票房？小紅姐一臉認真地說：「咁梗係希望好啦，因為喺台灣實在真係好好。咁嚟到本土，我當然希望好啦，如果唔係，真係有少少……丟面。我係一個幾要呢樣嘢嘅人。但我唔擔心口碑。我覺得……唔……睇過嘅人，或者佢唔認同，或者佢投入唔到，喺我啲政治裏面，或者劇情裏面，但我相信所有嘅演員，會令佢覺得部戲係好。真係㗎，個個side cast都有晒名堂，好多影后喺裏面。

至於有傳惠英紅今次拍《血觀音》係收平價，她即謂：「我真係要澄清囉，我搲晒頭，幾時有出現過五十萬？同埋點解係五十萬，唔係五百萬呢？唔Make sense。一來，演員從來唔會將自己嘅價錢講出嚟，第二，真係唔止五十萬。」她堅拒透露片酬約數，僅稱：「唔講錢，太市膾喇。」

講到話有傳惠英紅係因為有情有義先至收咁平嘅片酬，她說：「咩有情有義，我覺得又好好笑。我未接呢套戲之前我唔識個導演，我係接咗劇本之後上網起佢底，我先至知佢咁勁㗎！就係咁之嘛，可能第二套先至係有情有義，呢套一定唔係。呢套劇本真係好好。我可以俾人睇到我功力喺邊度，我好滿足。」

升呢做做金馬影后，片酬可會提升？佢話加唔加片酬呢個問題，惠英紅表示佢從來都唔理：「如果我理呢樣嘢，我做咗自己經理人啦。我係完全唔識。基本上幾多錢我係唔知。我簽嗰張約，要我去拍，咁我睇完劇本，我想拍，咁OK喎，我接啦，咁佢哋就去傾。我唔理㗎。」遇到好劇本不易，搵到自己想挑戰嘅角色更難，故惠英紅無奈地謂：「每次你哋問親我呢個問題我都係啞口無言，因為作為演員好被動。（做導演？）暫時唔想，暫時唔想。」

更多娛聞，喺晒《娛果》
http://fb.com/appledailyent