當年今日

購物焦點:
小飛俠今日上映醒你6大必買精品

蘋果日報 2002/03/28 00:00


迪士尼100周年搞作特別多,今日更有卡通電影《小飛俠2002飛越夢幻島》上映,3D電腦效果同傳統迪士尼畫法合成之餘,更有大批電影精品飛到。但勢估唔到各款精品之中,要同小飛俠PeterPan鬥多鬥搶鏡嘅並唔係大壞蛋鐵鈎船長,反而係細細粒嘅仙女小叮噹。
記者:張穎倫
攝影:陳偉強、陳盛臣
電影講啲乜?
今日上映嘅《小飛俠2002飛越夢幻島》,講述鐵鈎船長為消滅小飛俠,將女孩珍妮捉去夢幻島引他現身,果然小飛俠和拍檔仙女小叮噹出現,並成功勇救珍妮。但倔強的珍妮從不相信有夢幻島和小飛俠,更不相信小叮噹的飛天魔法,令小叮噹法力盡失。此時,鐵鈎船長再次出現,並利用珍妮令小飛俠跌入陷阱。究竟小飛俠能否化險為夷,並帶珍妮回到原來的世界呢?
小飛俠面相仔細
一般Figure公仔,通常最講究就係衣服鞋襪同各樣配件,一定做到真嘅一樣,但講到面相就會差少少,望落總係怪怪哋。不過今次PeterPan就非常厲害,除咗短刀、寶藏等配件落齊外,公仔表情更非常趣怪,眼仔睩睩,同電影簡直一模一樣。
售價:$149.9(玩具反斗城)
新女主角珍妮
有睇開PeterPan嘅朋友都知道溫蒂係第一女主角,但事隔多年,到咗2002年嘅新版,溫蒂已經長大成人,所以與不老小飛俠做拍檔嘅重任,就交畀女兒珍妮擔當。呢款珍妮處女作Figure,既有新鮮感,又有紀念價值。再講呢個Figure嘅關節位亦做得唔錯,外套又可以隨意穿着,玩法多多。
售價:$149.9(玩具反斗城)
女孩摯愛:換衫小叮噹
雖然連戲名都以小飛俠為題,但論受歡迎程度,小叮噹TinkerBell就有過之而無不及,事關小叮噹同睡公主、白雪公主等著名迪士尼女角一樣,已經有自己一個系列,就算冇小飛俠都一樣掂。好似今次小飛俠同珍妮都冇乜衫換,但小叮噹就除咗原本嘅仙女衫外,更可以另外買套晚裝畀佢換,配件拍得住Barbie。
售價:$129(DisneyStore)
冧女必備玻璃水球
若然你同女朋友一齊睇戲,完場時送上呢個玻璃水球,包保冧死佢。因為玻璃水球設計成一朵紫色鮮花一樣,水球內更有小叮噹同大堆閃閃紙碎,每次翻動水球都會閃起五顏六色嘅彩光,拍得住當年嘅水晶蘋果咁靚,係女仔都鍾意啦!
售價:$99(DisneyStore)
魔法棒有聲有光
貴為仙女嘅小叮噹,當然要有魔法棒傍身。小妹妹想扮吓小叮噹的話,呢支1:1魔法棒就一定啱玩,全長達38cm,各種花紋、寶石都跟足電影。呢支魔法棒只需兩粒2A電,就識播放音樂同發光,過程同小叮噹變法術時一樣,細路女一定鍾意。
售價:$59(DisneyStore)
鐵鈎船長大戰小飛俠
鐵鈎船長嘅Fans一定不容錯過,事關呢套情景玩具有齊海盜旗、藏寶圖、金幣等船長摯愛,武器方面更有埋長劍,連大炮都有,實力強橫。相反小飛俠就得把刀仔同小叮噹,強弱懸殊。要擺出鐵鈎船長對付小飛俠嘅各種布局,就要把握呢個機會啦!
售價:$89(DisneyStore)
售賣點
TheDisneyStore(25061073)
銅鑼灣時代廣場501號舖

玩具反斗城(27309462)
尖沙嘴海運大廈地庫032號舖