組合Soler嘅細孖Dino同老婆黃麗施，係一對平凡而幸福嘅夫妻，結婚7年育有兩子，大仔Damiano已經4歲，細仔Orlando就快兩歲，日前一家四口到數碼港嘅草地放狗兼享受親子樂，兩夫婦好細心為囝囝搽蚊怕水，Dino更體貼地幫老婆捽勻玉臂同心口，睇得出一家人都好有愛。

之後Dino同大仔去玩滑板車，兩父子仲鬥快越玩越興奮，其間Damiano唔小心失平衡跌倒，坐喺地下用手仔搓下膝頭哥，Dino行埋身邊慰問，但冇好緊張咁扶起囝囝。Damiano亦表現得好堅強，好快已經自己企番起身，繼續同爸爸玩滑板車；而Dino老婆就陪Orlando坐草地曬太陽，仲用手機幫細仔影相。

當Dino父子玩完滑板車返嚟休息，老婆就起身做下柔軟體操，Dino更犀利抱起肥嘟嘟嘅Orlando練舉重，o氹到細仔開心大笑。之後兩個仔就同狗狗跑去放電，Dino夫婦瞓草地頭貼頭談情，溫馨滿瀉。

對於大仔玩滑板車跌親，但自己起番身冇喊，Dino接受電話訪問表示：「呢個係自細教佢，跌親自己企番身，如果痛就教佢發洩，喊得大聲啲，佢好快就學識點樣處理痛苦，佢有個紀錄，喊唔會超過一分鐘，從來唔會喊到失控。」

Dino仲有一套獨特嘅教育方針：「好多香港人教育方式都係EQ好高，尊重番小朋友，但都要有底線，其實最緊要培養小朋友有秩序，中國人用乖形容，我哋嘅方法係尊重小朋友，但要有規矩，最重要係身教，如果小朋友行為差，我哋要反省，唔可以小朋友扭計就認為佢錯，佢一直喺度學緊我哋，所以身教好重要，想佢坐定定食嘢，自己都要坐定定，唔好玩手機唔好睇電視，我哋只畀囝囝睇《反斗英語》。」

至於將肥嘟嘟嘅細仔當舉重，Dino笑說：「佢覺得自己係超人，好鍾意喺高嘅地方跌落嚟，佢啲骨好重，我同太太都試過抱傷手甩骹要睇醫生，我直情全身歪晒要拍番正啲骨，o依家抱佢有技術，唔好立亂舉，但都好痛苦，佢眼神好想你抱，我唔捨得一定會抱，而且係呢個階段先可以抱。」