由韓劇《愛情的溫度》男星楊世鍾孖《我的黃金光輝人生》女星申惠善主演的SBS新劇《雖然30但仍17》，逢周一及周二播出，噚晚播出嘅第23及第24集，收視分別錄得9.3%及10.8%，當中第24集嘅10.8%收視就同之前第20集嘅最高收視紀錄一樣，劇集同時穩坐同檔收視冠軍。而港迷亦可以喺Viu煲劇網站同步追看。

《雖然30但仍17》劇情講楊世鍾一直以為是自己令到申惠善死亡，所以一直封閉自己，與世隔絕。而申惠善飾演13年前發生事故而陷入昏迷嘅女主角，佢因為昏迷13年，到有一日佢突然蘇醒，但佢嘅內心就仍然停留喺17歲。兩人事隔13年後重遇，雖然現時劇集就未講到二人相認，但兩人因為同住一屋，所以日對夜對關係產生愛火。

而噚晚一集就承接前日尾聲，講到楊世鍾因為擔心申惠善受傷害，所以唔想佢現身音樂節表演，更向佢表白，不過申惠善因為想借喺音樂節上拉小提琴，令自己有機會尋親，搵返舅父，所以就話扮冇發生過表白事件。到噚晚尾聲時，楊世鍾再次表白，雙方終於肯定感情，兩人仲連咀三次，令劇集繼續做收視冠軍。

更多韓流，喺晒《娛果》
http://fb.com/appledailyent