創科局未成立，特首梁振英已經搵咗疑似局長人選楊偉雄擔任創新及科技顧問。雖然楊偉雄未坐正，但業界都畀足面，香港軟件行業協會及香港資訊科技聯會合辦「香港創新及科技界領袖訪京團」，邀請楊偉雄做榮譽團長，率團今日至17日訪京，行程包括與中國互聯網發展基金簽署合作備忘錄，拜訪港澳辦及科技部等。

未為創科局拉票

睇番張名單，資訊科技界前立法會議員譚偉豪同立法會資訊科技及廣播事務委員會主席、即係民建聯葛珮帆都上榜，偏偏唔見現屆立法會資訊科技界議員莫乃光，唔通有心飛起阿莫？楊偉雄話自己獲邀出席，叫外界唔好咁敏感；香港軟件行業協會會長楊全盛就解釋，此行冇特別邀請立法會議員，參加者主要係業界團體嘅領袖喎。
楊偉雄透露暑假「無唞過」，同逾40名議員單對單交流過，肯定有為創科局拉票啦；但莫乃光同樣食白果，佢話冇獲邀同楊偉雄單對單傾偈，亦認為冇此需要，仲好公道咁話，無份隨IT團訪京責任不在楊，因為係親建制商會主辦嘅活動囉。