【逆權運動】Tommy太子站外默禱求天眼片 抱抱安慰痛哭少女
蘋果日報 2019/09/06 19:58
阮民安太子站警暴
一眾巿民下午開始在太子港鐵站外，要求公開831天眼片段，現場群情洶湧，多次有人已站出馬路，警方亦多次用大聲公呼籲市民離開，巿民口號已由「黑警還眼」改為「黑警填命」，黃昏時分阮民安（Tommy）到達太子地鐵站支持巿民，亦對於831疑有巿民因被警方暴力拘捕犧牲，他站在港鐵鐵閘外的花海前默禱，其間有戴上裝備少女上香後悲痛不已，跟Tommy談了幾句後痛哭，他擁抱對方安慰，而他自己也掩臉眼濕濕。
Tommy表示831警員濫暴情況下，很多巿民欲知道是否有巿民犧牲：「好需要話畀香港巿民知道真相，要知道嗰日發生乜事，cctv一定要畀我哋睇，令我哋釋懷。如果話私隱，可以blur啲人樣，但要知發生乜事，要知道警察當日點樣對待巿民。今日來我就係想聲援吓。」但他強調希望當晚沒有巿民犧牲，若不幸有犧牲者，他強調一定要追究。
其間他安慰女生相擁，他表示看着女生上香，身後很多同路人也一直在支持，但他也感觸流淚：「呢一刻已經冇話邊個幫邊個，佢叫我加油，話佢自己好辛苦好傷心，我只能大力攬一攬佢，同佢講無論點傷心都唔好亂諗，叫佢唔好輕生，因為我哋唔可以再失去任何一個戰友。」
而Tommy有感大家每天都看着新聞，希望設平台讓大家紓緩壓力，而他最擔心再有人輕生：「好多人喺社交平台inbox我，都係話好傷心冇力，想我share搵人幫手幫得一個就一個，我同佢哋講幾夜我都會做，希望佢哋唔好困喺一個難過嘅地方，要搵出口。好擔心，今日下晝又有新聞話有人自殺，連日來都有。希望大家唔好太壓抑，之前我喺銅鑼灣街頭唱歌，想有個平台畀娛樂大家，令佢哋開心一陣有正常生活。」
採訪：王連連
攝影：仇志德
Tommy在太子港鐵站外的花海前默禱。
其間有戴上裝備少女在Tommy附近上香後悲痛不已。
Tommy安慰了對方，少女痛哭，Tommy亦掩臉眼濕濕。
Tommy希望港鐵可以公佈當日cctv，讓市民知道正相。
Tommy最擔心再有人輕生，希望所有人都唔好太壓抑。