當年今日
關於我們

兩周減4磅 醫生有話講
君如肥雞特訓去脂 難!

蘋果日報 2002/12/20 00:00


吳君如為拍攝電影《金雞》,要增肥十磅。拍罷《金》片後,她近日正努力做運動球、踩踏步機及單車等減肥,可是只減得四磅,醫生跟君如表示她因新陳代謝慢,故減肥會較慢。
吳君如在男友陳可辛監製之電影《金雞》中,飾演妓女,由十五歲演至四十歲。由於故事題材圍繞八十年代,君如為配合角色,特意增肥十磅,露出大條士啤胎及肥胖的手腳,直至該片拍竣,君如才節食及做運動減肥,她更揚言要摒棄珠圓玉潤,重做窈窕淑女。
現時君如每日只吃沙律、清湯及麥包,除此之外,她又做健身減磅,日前她在黃埔一間酒店做健身時,就進行減肥運動四部曲,包括做運動球、踩踏步機、踩單車及做situp,而她經過兩周的「特訓」,至今只減掉四磅,進度相當緩慢,君如為此大感失望。

新陳代謝較慢
君如說:「我拍《金雞》嘅時候,最肥有一百一十二磅,我嘅標準體重係一百零四磅,但我做咗個幾兩個禮拜運動,到𠵱家只係減咗三、四磅,好失望。醫生話我新陳代謝慢,惟有慢慢減,我阿媽就鍾意我肥啲,但我貪靚,同埋唔想打爛自己嘅減肥金漆招牌。」
君如為《金》片可謂犧牲甚大,除了做肥婆外,又要與片中多名「嫖客」演床上戲,當中包括胡軍、七十多歲的阿伯和三百磅的大肥佬等等,君如說:「同個肥佬拍床上戲都要過心理關口,嗰場戲我淨係着胸圍同底褲,坐喺佢上面,重要咀埋㖭,問你死未?其實佢重驚過我,所以喺拍之前我都有同佢傾吓偈。」

朋友寄予厚望
君如表示有不少朋友都對她這部戲有寄望,她感到壓力。君如笑言若能憑《金》片奪獎,也不會考慮結婚息影,她笑說:「事業有進展,就梗係唔會諗結婚住啦,我希望四十五歲至收山。」
採訪:朱芷瑩
攝影:甄朝健
場地提供:黃埔海逸酒店