上期提到騎師陣容大執位，至於練馬師方面，兩個離開，一個入替，騎師年代跟隨簡炳墀學藝的丁冠豪獲發練馬師牌。

雖然他開倉時間較為倉卒，但收馬數目頗為可觀，始終丁仔在圈內時間長，近幾季亦在沈廐擔任副練，人脈廣闊！

開操後積極備戰，練者更親力親為，自己落場操馬，摸熟馬性。新開倉最緊要夠支持量，新馬舊馬一樣照收，不過老馬較多，以及評分飽和馬不少，要在季初爭取大量頭馬有一定難度。

剛過去的周末（25日），進行了嘉年華草閘，可留意幾匹馬會否於季初出擊！

高廐「協勝神駒」出閘暢順，緊扣韁繩自己撲上，勢頭強勁，上季三班勝後上二班作賽有點壓力，但仍接近而回，今季才四歲，進一步改善重口問題，二班一樣可勝！

同馬房已報特首盃的「有理共想」，嘉年華閘墜手有力，刻意跟隨馬匹後面，皆因早段頗為搶口，需搵遮擋，但末段展步力度十足，惟個人認為田泰安並不是最佳配搭。

同組閘「好吉利」也需留意，出閘受阻，最後200米騎落反應甚佳，屬麥廄的重要兵源。

另外，呂健威馬房試馬亦不少，「真好彩」高分馬輕鬆試贏，一放到底。三班馬「肥仔」由韋達出試，起步稍慢，但600米後走勢越跑越順，顯露鬥心過馬。