由韓劇《我係金三珣》女星金宣兒夥拍甘宇成主演嘅SBS新劇《能先接吻嗎》，噚晚播出第15、16集，港劇迷可於Viu同步追看。

承接上集劇情，金宣兒得知甘宇成嘅愛犬星兒已離世，即到甘宇成嘅屋企安慰佢，仲即時攬住甘宇成，肉麻話：「我想咗一日，我要抱你，今天我要主動抱你、一整天貼着你，要整晚抱抱你。」點知甘宇成嘅前妻韓高恩喺屋內，韓高恩仲見到二人攬攬嘅溫馨場面，大感不是味兒。

金宣兒同甘宇成嘅感情更進一步，兩人亦發生咗關係，金宣兒一醒來就因感動而流淚：「呢種感覺...真係久違好耐，我都係一個女人，我亦都係個人啊，我也是個活着嘅人啊，謝謝你。」金宣兒得知甘宇成要加班，所以就帶定便當去甘宇成公司搵佢，點知甘宇成就聽到金宣兒同朋友講電話，金宣兒就講：「如果扮陷入愛河，真係會産生愛嗎？會弄假成真嗎？我諗唔起乜嘢係愛，怎樣先係愛，算了、算了，我咁樣仲談乜嘢戀愛，我唔需要愛，只要結婚，我係寄生蟲。」

原本甘宇成嬲嬲豬唔理金宣兒，點知佢諗咗一晚，即去搵金宣兒，見到金宣兒住嘅地方十分簡陋，甘宇成就提出：「我哋一齊生活吧，結婚吧。」令金宣兒大感驚訝。鏡頭一轉就去到兩個月前，甘宇成去見醫生，原來佢嘅癌細胞已經擴散到肺、腹膜同埋肝臟，醫生話佢知佢只剩三個月命...

噚晚《能先接吻嗎》兩集收視分別係8.5%及10.9%，繼續穩坐同時段收視冠軍，而MBC新劇《偉大的誘惑者》播出第3及第4集，以3.1%、2.7%收視，排同檔第二名；KBS嘅《Radio Romance》繼續錄得2.9%收視，包尾墊底。

更多韓流，喺晒《娛果》
http://fb.com/appledailyent