湖人隊嘅巨無霸奧尼爾早前去做體檢,專登睇吓個腎同個肝,報告話佢個腎、肝都有損壞,雖未致好似「鬼見愁」莫寧咁要即刻停賽休養咁嚴重,但係已經嚇到巨無霸有得震冇得瞓。
喺前日湖人作客完熱火之後,巨無霸竟罕有咁向傳媒大吐苦水,話唔好睇佢平時喺球場上威風八面,其實佢係受害者嚟嘅;喺籃底就好似箭靶咁俾人狂插,搞都傷痕纍纍,痛楚難當,成日要靠食好多消炎藥嚟止痛。如果唔係,根本痛到連跑都跑唔郁。
奧尼爾重話莫寧就係因食消炎藥太多搞到腎虧,佢𠵱家誠心禱告,希望自己千祈唔好步莫寧嘅後塵。
我求大俠𠵱家先知原來呢班超級好搵嘅少爺兵,背後有鮮為人知嘅辛酸故事,我哋今季已經冇咗波神佐敦,真係唔想連巨無霸都冇埋,衷心祝佢早日唔使再啪丸仔啦!
查斯坦求饒總要定
差啲收曼聯中場碧咸檔嘅拉科前鋒查斯坦,希望奧脫福嘅球迷大人有大量,喺今晚場波畀番啲尊嚴佢,但我睇嚟曼聯球迷唔會咁順攤。不過,好彩曼聯啲球迷向來唔算太野蠻,淨係會噓吓咁啫,唔學似啲西班牙球迷咁掟啲手機同水樽落草地,做埋啲危害球員生命嘅嘢。
中葡大戰門券唔益港人
負責發售中葡大戰波飛嘅廣星傳訊,噚日只得一千張飛賣畀香港球迷,數量少之餘又冇得揀位,最弊就係佢哋行政混亂,有讀者投訴電話訂票後竟然冇飛攞。計我求大俠話,既要受氣又
希斯菲特又打心理戰
拜仁教練希斯菲特早幾日話德甲聯比歐冠盃重要得多,好似唔多着緊今晚對皇馬場波,但我求大俠一聽就知佢又喺度玩心理戰啦!熟悉希斯菲特嘅球迷,都知道佢最鍾意喺大戰前出口術,周不時放啲流料出嚟,想對手對佢哋冇戒心。老實講,皇馬教練迪保斯基雖然唔係乜嘢名教練,但係之前都領教過希斯菲特呢啲招數,睇怕佢今次都係當希斯菲特發噏風!
老舒中咒紐記心慌
紐卡素前鋒舒利亞喺前晚對富咸,入唔到佢喺超聯第二百球,隊波重俾富咸迫和㖭,但我求大俠就戥紐記擔心嘞,事關奧雲上次喺對米杜士堡射入佢喺利物浦嘅第九十九球後,等咗大半個月先至入到第一百球;如果老舒入唔到波,紐記想贏多幾場聯賽踢來屆歐冠盃咪凍過水咯!
南韓國腳唔搵真銀
錢喺南韓國腳黃善洪及洪明甫眼中,原來唔係太重要。事關佢哋兩個為咗踢好世界盃,表示會暫時放棄拍廣告,寧願賺少啲都唔希望辜負球迷對佢哋嘅期望。我求大俠就認為此舉好值得其他人學習。班國足喺成名之後,為咗賺錢同出名就四圍做秀,兼且成日掛住拍廣告,本末倒置。查實做人應該放眼將來,如果喺世界盃踢得好,唔憂第日搵唔到啦。
艾華遜想復出被喝停
艾華遜噚日話想要喺常規賽最後一場對溜馬時復出,不過教練布朗就唔同佢癲,立即喝令班球員唔好聽艾華遜發噏風,講明如果醫生唔畀佢出場嘅話,就算打緊總決賽都冇得傾。我求大俠奉勸華大俠一句,波神單你有眼睇啦,提早