伍詠薇、張文慈、姜皓文、陳啟泰、江美儀等，噚晚喺尖沙嘴出席「A記同學會」聚會，好多台前幕後亞視舊人出席，場面熱鬧。伍姑娘話自己係第一年參加：「之前喺facebook睇到A記同學會搞聚會，幾百人一齊合照，覺得好震撼。我94年離開亞視，自己有好多前輩，亦有好多後輩，我驚好多人嘅名都唔記得，會好尷尬，今年先叫得我郁，係因為有好多幕後出席，當年我喺亞視拍過好多劇集，同crew種下嘅感情，深過啲演員。」

伍姑娘笑話諗起以前喺亞視拍劇嘅開心日子，o依家仍然好回味，當中亦有過唔少瘋狂事，「拍時裝通常會着高踭鞋，加上我嘅年代冇助手，拎住紅色膠袋，袋住我對拖鞋，着高踭鞋入廠拍劇，放飯換拖鞋時，成班crew陰陰笑，我都知佢哋整蠱我，原來收埋喺燈槽上面，當時男對手任達華見我咁，話我唔應該用膠袋。又試過拍劇冇時間返屋企，嗰時清水灣片廠外面有塊空地，有條洗車水喉，我就用嚟洗頭，雖然冇咩特別，但諗番起都好開心。」

另外，張文慈話好開心見番以前啲朋友：「好似返到屋企咁，今年係我第三年參加。」Pinky話啱啱喺澳洲傳福音返港，可惜冇艷遇，問佢可唔可以接受異地戀?Pinky話：「我以前都有個日本男朋友，未試過同鬼佬拍拖，就算搵男友都會揀東南亞人，黃皮膚易溝通。」佢又話去到澳洲肥咗好多，o依家正努力減肥，因為接咗兩個內地廣告，又要幫馬會拍宣傳片，亦都妝幫大台劇使宣傳，嚟緊五月有兩套劇會播出街。

精選娛聞，喺晒《娛果》
http://fb.com/appledailyent