洪朝豐、林敏怡將於下月8、9日喺中環藝穗會舉行兩場《靜心。能量。音樂會》，學打坐多年，現在已經係打坐靜心老師嘅洪朝豐係今次音樂會嘅發起人，佢話之前去咗泰國打坐，悟出咗自己將來，佢要發展打坐、靜心同唱歌，所以唱頌係佢將來路向，返嚟就即刻揾敏怡合作，一個星期已經決定場地同表演者。

敏怡喺06年，分別去美國同北京，接受研發「銅人療法」嘅美籍華人譚輝醫師培訓，並將「銅人療法」引進香港，目前已經係自然療法醫師，有自己嘅工作坊。佢話：「音樂會頭半小時，洪朝豐會帶領大家打坐，進入寧靜境界，拋離塵世干擾同焦慮。」

洪朝豐就話，佢學咗打坐已經好多年，呢四年就有教學生，佢話：「打坐會令個心靜咗好多，以前做DJ演員經歷好多，加上我有鬱躁症，路難得好多，O依家每隔幾個月會睇醫生同食藥，以前試過停藥，結果搞到入醫院，要接受強制治療。」

去年洪朝豐同記者講，話會移民法國，點解依家仲喺度？佢哈哈笑咗兩聲，然後話：「係呀，唔移民喇，上天安排好微妙，有另一樣嘢比我做。」洪朝豐話下個月音樂會之後，佢就會飛去巴西里約熱內盧做全職義工，會教市民打坐，一直留到12月尾，預計明年１月先返香港，之後都會宣揚打坐，因為覺得好豐盛、好開心。」敏怡同洪朝豐又話，今次係同團隊首次合作，希望將來有更大場地可以做，可以去到紅館，利用唱頌感動人心。