嘉頓新抱、珠寶設計師張王幼倫（Michelle)創立「領賢慈善基金」，慈善晚會今晚假尖沙嘴洲際酒店舉行，身為基金會青年大使嘅陳奕迅（Eason）、四屆格林美獎得主、國際女高音歌唱家蕾妮．費蘭明（Renée Fleming），以及基金主席張王幼倫、陳寶珠、梅雪詩、林建岳、劉偉強、李國寶夫婦等出席，Eason同Renée合唱出單曲《I Want》為基金籌款，請咗著名作曲家高世章重新編曲，郎朗鋼琴伴奏。

《I Want》好多人翻唱過，Eason表示：「係呀，我都有參考，最先係聽Deanie姐（葉德嫻）八十年代版本，知道原來葛蘭姐姐係原唱，呢首歌係我揀，覺得幾得意，首歌可以容納唔同語言，未認識呢位女高音前，都諗佢可唔可以唱啲咁鬼馬嘅歌，點知佢都好鍾意。」

Renée就說：「今次好開心好興奮，Eason是很有趣的人，事業範疇亦很多，知道他是演員。」身旁嘅Eason聞言笑道：「我已經拍咗三十套戲，大家睇住我成長。」Renée接住話：「我都好鍾意Eason把聲，覺得好有力量，聲音質感好好。」問會否盡地主之誼帶Renée周圍去？Eason話：「下次先啦，佢話覺得香港好潮濕，但對把聲好好，知道佢嚟緊喺紐約有音樂劇，可以帶埋阿女去，有藉口放下假。」

問主席張太希望今次籌到幾多錢？張太表示：「我哋唔講錢嘅，兩位巨星嚟支持好榮幸，我同兩位都好熟悉，佢哋一口答應。」Eason笑道：「我直情流晒口水。」

相關文章：
【add即時．尚】包包鋼琴8級 徐濠縈陪練陪到瞓 張王幼倫借音樂行善
http://bit.ly/2spMN90