曹永廉、唐文龍、陳潔玲、楊卓娜今日到油麻地為好友開設紋繡學校舉行開幕儀式。曹永廉去年演藝事業得意，眾望所歸攞埋最佳男配角獎項，另外又從商搞生意。

阿廉有意同學校合作喺大陸開辦學校，指今年工作上好滿意，十月尾會去美國四個賭場登台，之後會同家燕姐到雲頂登台，11月會開拍劇集，隨後與蕭正楠、黃浩然、黎耀祥四位大太監班底去拍旅遊特輯。問到今年係咪好豐盛，阿廉話：「今年啫，今年好希望蕭正楠攞任何一個獎項，好似飛躍進步都好，o依家係佢人生高峰，唔攞幾時攞，投我票嘅人都唔好投我，投畀佢啦，佢唔係好夠票。」兩人真係好兄弟，記得舊年蕭正楠都出盡力幫阿廉拉票，阿廉話：「攞過就算啦，今次佢喺《超時空男臣》裡面真係做得好好，人生高峰，我希望扶一扶佢，大家都開心，大家都滿意呢一年。」

唐文龍專注大陸發展，不過喺香港都有同劉永健經營日本餐廳生意同其他網站平台，未來都想發展多啲商業，佢強調自己並唔係轉型，一樣會照拍戲做演藝事業，仍然好有鬥心，只係以前入行時候合約唔許可，o依家年代唔同，好多入行小伙子都會去做生意，自己繼續努力。