當年今日

《衰仔》老竇玩轉荷李活
佐治、辛潘淪為金正日爪牙

蘋果日報 2004/10/26 00:00


故事天馬行空嘅卡通片《衰仔樂園》曾經喺美國掀起熱潮,而卡通嘅兩位創作人杜利柏加(TreyParker)同麥特史東(MattStone),最近又有新搞作,佢哋用咗半年,製作出玩盡政治人物兼荷李活紅星嘅木偶動畫《T.A.反恐戰隊》。

影帝粗口信炮轟
呢部木偶動畫未上映已經新聞多多,奧斯卡影帝辛潘(SeanPenn)早排寫咗封以粗口作結嘅公開信,炮轟佢哋唔應該叫啲唔知選邊個做總統嘅選民放棄投票,柏加就話因為辛潘喺部戲入面被玩先至發脾氣,不過佢兩個就想多謝辛潘,因為俾佢鬧一鬧,部戲又多咗人注意。
《T.A.反恐戰隊》擺明諷刺布殊所謂嘅反恐戰,柏加同史東又覺得辛潘、佐治古尼(GeorgeClooney)等影星盲目反戰,好適合做喜劇題材,所以安排佢哋俾想毀滅世界嘅大魔頭金正日蒙騙,揸晒槍對抗反恐戰隊,而一向反布殊嘅米高摩亞(MichaelMoore)重變成恐怖分子㖭!