劉心悠今日到尖沙咀嘴文化中心，出席護膚品品牌活動，以全套芭蕾舞服現身嘅心悠仲跟香港芭蕾舞團團員一齊示範芭蕾舞動作，心悠話自己大約6、7歲嘅時候學過芭蕾舞：「不過學咗半年就放棄，因為每日都要拉筋，我隻腳根本就拉唔到上去，當時淨係覺得好辛苦，長大後先發現原來啲動作係咁靚，真係好鬼靚。」

心悠話日後有機會都想在重新學習芭蕾舞，又表示唔使開工嘅時候自己都有keep住跳舞，乜嘢舞蹈類型都跳等自己身體保持住運動量，更又希望可以演繹一啲靠肢體語言去表達嘅角色，舞台劇、音樂劇或電影都可以。

心悠最近夥拍黃宗澤、苗僑偉等拍緊網劇，早前更去到捷克布拉格拍外景，心悠話：「當地環境好靚，去咗兩個星期，中間有啲時間出去遊覽，不過周圍都好多人，可能全部都係遊客區。」o依家就轉到深圳繼續拍攝，心悠話媽咪仲特登陪佢拍攝，佢話：「媽咪好好，每日都喺酒店等我返嚟，我問媽咪你唔悶咩？佢話想我每日做完嘢返嚟有人傾吓偈，聽完覺得好sweet。」

更多娛聞，喺晒《娛果》
http://fb.com/appledailyent