下半年青山公路率先展開新盤大戰，發展商開盤前都有車輪式宣傳攻勢，九龍倉（004）嘅深井碧堤半島，前日先向代理推銷秘密武器之一嘅風水，噚日就披露物業位置圖，配合風水陣，買家就可以好容易搵到心水單位。
九倉黃光耀話，今年先賣碧堤半島六、七座，明年初推八、九座。蘭西從位置圖所見，率先推出市場嘅四座物業，最近青山公路嘅係E、F、G及H室兩房細單位，面積六百至八百方呎，望山景；A、B、C、D室三房單位，面積一千至一千一百方呎，屬向海單位，青馬大橋及珀麗灣盡入眼簾。屋苑嘅左邊青龍位（青衣島），右邊白虎位（大嶼山），同前面玉帶環腰嘅青馬橋，全部展示晒出嚟。
黃光耀透露，碧堤半島有四款示範單位示，重要等多一星期至搞掂，至於幾時發售，就要時間配合。而代理美聯就話，計劃用二百萬元宣傳碧堤，嚟緊一個月嘅周六日以花車巡遊吸客。

代理互鬥商人得利
馬灣珀麗灣開售後釋放嘅購買力，成為各發展商爭奪對象，究竟點樣先可吸引到呢批客買自己個盤，最簡單當然係減價啦！所以近期開售嘅新盤，發展商都開晒聲話低價賣樓，同時盡量搵埋代理幫手。但係咁多個盤，個個都咁做，咪又冇晒優勢？
部份發展商見代理有好多珀麗灣向隅客喺手，就打代理主意，畀個盤佢哋做獨家，等經紀說批客轉投自己個盤。而代理行間瓣瓣都鬥，攞到獨家點都會搏命促銷，免得俾對手笑到面黃，發展商就借助代理行間嘅矛盾，從中得益。但係咪個個盤都可以用呢招就好難講。