恒指勢如破竹，淡友仲因一路被殺平倉，變成上升嘅火箭燃料。我早排講過，當今世上已冇人敢再出聲叫人做淡，之前睇淡都係偷偷哋自己去做。費事嗰班跌市時會完全消失唔出聲變鵪鶉嘅人，大大聲笑你。
不過，去到上個禮拜，試問你附近仲有冇人做淡？偷偷哋想做都因彈盡糧絕而有心無力。
去到破萬九後，我覺得下個位將會喺21327點，因根據bloggerMoneyCafe，嗰個係恒指07年高位差不多32000點，同08年低位穿11000點嘅黃金比率。
點解要信黃金比率？唔信，唔通用基本分析咩？
點都好，全球任何資產價格齊上升，歸根究柢又可賴美元弱雞。美滙指數，已由3月高位差不多嘅90點，跌穿79點。基本上，恒指係咪可以完全唔使理啲上市公司未來盈利，繼續盲目咁升，就係睇美元死唔死。