韓君婷做粵劇有噱頭 王賢誌:化咗妝係人係鬼都睇唔到
粵劇東華三院新光戲院王賢誌韓君婷
王賢誌同韓君婷一齊到北角新光戲院出席東華三院舉行慈善粵劇晚會,呢次由三太陳婉珍贊助蓋明輝演出《俠盜胭脂》。
王賢誌話因為啱啱約咗韓君婷去飲嘢,兩人又好耐冇見,時間緊迫想見多啲,就叫埋對方一齊嚟。兩人被問到最近忙緊乜?韓君婷就話目前做緊醫學美容方面嘅嘢,日日朝九晚五,有時要OT,放工又逼下地鐵咁,生活都幾平淡。咁王賢誌有冇投資落佢盤生意?王賢誌話:「我哋係朋友嚟啫,我返到香港開工之後都係一兩個月先見到一次,互相支持下。」王賢誌就話因為下年4月就升做主席,所以一路都好忙。
兩人又被問到會唔會粉墨登場?韓君婷就話自己未試過做粵劇,記者笑指鬼妹做粵劇都幾有噱頭,王賢誌就笑道:「化咗個粵劇妝,係人係鬼都睇唔到㗎啦!自己其實都唔係好敢做粵劇,驚嚇親人,不過叫朋友做就得,佢哋一定會支持。」記者提議兩人反串演出?王賢誌就話都幾得人驚喎,其實自己冇乜粵劇天份,反而媽媽就有唱開,仲成日錄音,雖然自己一上車就會聽到,但係都未投入到,所以自己都係齋睇會好啲。