今年一開波環球股滙大跌、銀行凍薪，近日仲有對沖基金話沽空緊港元同人仔，一時間山雨欲來，睇到華華心驚驚。噚日滙豐銀行副主席兼行政總裁王冬勝（Peter）出席公開場合，華華趁機問吓呢位資深賓架點睇，向來有「銀行界朝偉」之稱既Peter一貫語調輕鬆，話自己喺36年銀行家生涯中，見過大大小小10次金融風暴啦！唔通Peter好似葉問咁，1個打過10個風暴「未驚過」？連同場嘅前政務司司長唐英年都忍唔住插口：「希望Peter唔會見到第11次啦！」
10次金融風暴聽落有啲誇，但好似滙控（005）呢啲咁「環球金融 地方智慧」嘅大集團，如果將近幾十年新興市場嘅經濟危機都計算在內，經歷過10次風暴唔算係吹水。

華華數極得9個

例如前滙豐亞太區大班邵銘高，都曾形容自己近40年賓架生涯中，經歷過7次金融風暴，除咗最為人熟悉嘅97年亞洲金融風暴、08金融海嘯，仲有90、91年波斯灣戰爭引發嘅英美經濟衰退；94年墨西哥經濟危機；2001年阿根廷債務爆煲……不過華華以Peter由1980年開始做賓架起計，數極暫時都數到9個風暴，仲有一個係乜？或者有待Peter或其他前輩解答喇。
唐唐仲溫馨提示，香港嘅花名係「ATM」（自動提款機），即無論係「存款或提款上」都比較流通，呼籲大家量力而為。

李華華
mailto:[email protected]